Опубликовано: 11.08.2020

«Кытаанахтык киирэр куһаҕан ыарыы эбит»
Аан дойду үрдүнэн саҥа коронавируснай инфекция тарҕанан, сирдээҕи олох укулаата тосту уларыйда. Биһиэхэ эмиэ ɵрɵспүүбүлүкэ уонна оройуоннар оперативнай штабтара күннээҕи быһыыны-майгыны тохтоло суох биллэрэ тураллар: Дьокуускайга, хайа эрэ оройуоҥҥа хас киһи ыалдьыбытын, эмтэнэн үтүɵрбүтүн уонна, хомойуох иһин, туораабытын туһунан. Утары дьайар вакцината ситэ-хото оҥоһулла илик, туоҕа-ханныга биллибэт кутталлаах ыарыы саба бүрүүкээн, медицинскэй мааската, бэрчээккитэ суох аны уулуссаҕа тахсыбаккын, уопсастыбаннай сирдэргэ сэрэнэн-сэрбэнэн сылдьа сатыыгын. Хаһан тохтуур, сүтэр ыарыыный диэн искэр кэтэһэ, эрэнэ саныыр эрэ курдуккун.
Ол да буоллар, үгүс дьон ɵттүттэн маныаха барытыгар итэҕэйбэт сыһыан суох буолбатах. «Ханна баар ыарыыны кэпсииллэрий», «политика буолуо» диэн уонна да араастык тойоннуур киһи үгүс.
Дьиҥнээх хартыынаны сырдатахха, Ньурба оройуонугар коронавирус бэс ыйыгар тиийэн кэлиэҕиттэн, уопсайа отучча киһи ыалдьыбыта биллэр. Билигин, атырдьах ыйын 10 к. туругунан, Киин балыыһа ковиднай отделениетыгар yс ыарыһах эмтэнэ сытар.
👇🏼👇🏼👇🏼


Баар балаһыанньаны ылыммакка, дьон-сэргэ сэрэҕин сүтэрбэтин, ыарыыга хаптарбатын, харыстанарын туһугар коронавирус дьаҥын этинэн-хаанынан билбит, ɵйүн-санаатын нɵҥүɵ аһарбыт киһини истиэҕиҥ. Ньурба куоратын олохтооҕо, биэнсийэлээх, Олесов Анатолий Андреевич биһиэхэ бу курдук кэпсээтэ:
– Бастаан уоспар герпес тахсыбыта. Ону мин тымныйдым быһыылаах дии санааммын, эмтэммитим, маастаммытым кэнниттэн уоһум испитэ сүтэн хаалбыта. Оттон икки эҥин хонон баран сɵтɵллɵн киирэн барбытым. От ыйын 12 күнүгэр температурам тахсыбыта. Сарсыныгар эмиэ температуралаабытым. Инньэ гынан поликлиникаҕа эрийэн быраастары ыҥырбыппар, кэлэн кɵрбүттэрэ, эмп анаабыттара. Сарсыныгар хаан анаалыһын ылбыттара уонна КТга илдьэн түһэрбиттэрэ. Эбиэт кэнниттэн компьютернай томография түмүгэ биллэн, «икки ɵттүгүнэн ойоҕоступпуккун» диэн буолбута. Миигин тута Киин балыыһа инфекционнай отделениетыгар киллэрбиттэрэ. Анаалыс биэрэн баран, онно икки хоммутум.
Ол кэнниттэн анаалыһым түмүгэ «ковид» диэн бигэргэнэн, ковиднай отделениеҕа кɵһɵрбүттэрэ. Онно оруобуна икки нэдиэлэ сыттым, туругум тупсан, үчүгэй буолан таҕыстым. Түгэнинэн туһанан, кыһанан-мүһэнэн эмтээн-томтоон атахпар туруорбут эмчиттэрбэр – терапевт-быраастарга Ефимова Инга Владимировнаҕа, Балдандашиева Сахая Афанасьевнаҕа, атын быраастарга уонна медсиэстэрэлэргэ улахан махталбын этиэхпин баҕарабын. Уопсайынан, Ньурба Киин балыыһата бу ыарыынан ыалдьыбыт дьону эмтээһиҥҥэ бэлэмнээх, үчүгэй тэрээһиннээх эбит. Кислородтара эҥин баар, онон тыыннараллар.
Кытаанахтык киирэр ыарыы эбит. Биир нэдиэлэни быһа температуралаабытым, аһыыр да сэниэ суох этэ. Оттон, дьэ, эмтэнэн, температурам түспүтүн иккис хонугар аччыктаабыппын билбитим…
Хантан сыстыбыппын билбэппин, хантан кэлэн түспүтэ буолла.

Мааскалаах уулуссаҕа тахсабын, мээнэ ханна да барбаппын, тугу гына сылдьыамый. Арай маҕаһыынтан килиэп ыларым, биирдэ эмит баантан харчы устарым. Сорох дьон итэҕэйбэт да буоллаллар, баар ыарыы. Олох куһаҕан, ыарахан ыарыы, боростуой грипп курдук буолбатах эбит.
Онон Ньурбам дьонун коронавирустан харыстанаргытыгар, мааскалаах сылдьаргытыгар, бары ирдэнэр санитарнай-эпидемиологическай нуормалары тутуһаргытыгар ыҥырабын уонна ыарыйдыгыт да, тута медиктэргэ биллэриэххитин наада. Ыарыыны уһаппакка эмтиир курдук. Бэйэҥ эмтэнэн хайдах да кыайбаккын.
Кэпсэттэ Раиса Никифорова.