Опубликовано: 19.06.2020

Убаастабылаах Ньурба оройуонун медицинскэй үлэһиттэрэ уонна доруобуйа харыстабылын бэтэрээннэрэ! «Ньурба оройуонун Киин балыыһата» СƟ ГБУ администрациятын уонна профкомун ааттарыттан Эһигини бэс ыйын 21 күнүгэр бэлиэтэнэр медицинскэй үлэһит Күнүнэн итиитик-истиҥник эҕэрдэлиибин!

Билигин доруобуйа харыстабылыгар саҥа ирдэбиллэр хаһааҥҥытааҕар да күүскэ тураллар. Аан дойдуга, Россияҕа, Сахабыт сиригэр, тɵрɵɵбүт Ньурбабытыгар саҥа короновируснай инфекция тарҕаммытынан сибээстээн, биһиги, эмчиттэр, үрдүк бэлэмнээх эрэсииминэн үлэлиибит-хамсыыбыт, оройуон дьоно-сэргэтэ ыалдьыбатын туһугар бары билиибитин, кыахпытын, сырабытын ууран туран туруулаһабыт.

Ол да буоллар олох салҕанан барар, барыта ааһыа, оннун булуо диэн улахан эрэллээхпит. Бары бииргэ буоллахпытына, эмчиттэр аналбытын толорон, ыарыы тарҕаныытын бохсон кинини киэр үтэйдэхпитинэ, оттон нэһилиэнньэ ыарыы кутталын ɵйдɵɵн бары сэрэтэр, кɵмүскэнэр миэрэлэри тутустаҕына, барыта этэҥҥэ буолуоҕа.

Идэлээх бырааһынньыкпытын үɵрэ-кɵтɵ бэлиэтээн ааһыаҕыҥ, сырдыкка, үтүɵҕэ тардыһан, салгыы үүнэ-сайда туруоҕуҥ. Барыгытыгар махталлаах үлэҕитигэр үрдүк ситиһиилэри, бэйэҕитигэр уонна чугас дьоҥҥутугар кытаанах доруобуйаны, инникигэ эрэли, дьолу-соргуну, туруктаах буолууну баҕарабын!

«Ньурба оройуонун Киин балыыһата» СƟ ГБУ кылаабынай бырааһа Наталья Николаевна ПАВЛОВА.